(France) 18 Nof 2018. Madaxweynihii hore kooxda Paris St Germain ee Charles Villeneuve, isla markaana ah saaxiib u dhow Arsene Wenger ayaa sheegay inuu marqaati ka ahaa wada hadal horey u dhex maray macalinka reer France iyo kooxda Real Madrid.
Tababaraha reer France ee Arsene Wenger ayaa go’aansaday inuu ka tago kooxda Arsenal dhamaadkii xilli ciyaareedkii hore, kadib mudo dhan 22 sano uu ku soo qaatay.
Ilaa iyo haatan, tababare Arsene Wenger ayaan wax shaqo ah ee ku aadan dhanka tababarka qabanin tan iyo markii uu ka tagay kooxda Arsenal, inkastoo uu xaqiijiyay inuu ku laabanayo markale garoomada isagoo macalin ah.
Dhinaca kale Arsene Wenger ayaa wuxuu qeyb ka ahaa macalimiinta ay isha ku heesay kooxda Real Madrid, xili ay isku dayeen inay la saxiixdaan dhowr jeer oo horey, balse uu iska diiday si uu u sii joogo kooxda Gunners, waxaa sidaas xaqiijiyay Madaxweynihii hore kooxda Paris St Germain ee Charles Villeneuve.
“Waxaa jiray labo kooxood oo had iyo jeer doonayay Arsene Wenger, waana Bayern Munich iyo Real Madrid”.
“Waxaa jiray sababo badan ay labadan kooxood ku doonayeen saxiixa Arsene Wenger, waxaana ka mid ah inuu ku hadli karo afar luqadood kala duwan”.
“Waxaan marqaati ka noqday wada hadalada hada kahor dhex maray kooxda Real Madrid iyo Arsene Wenger, laakiin ugu dambeyntii wuxuu go’aansaday inuu sii joogo kooxda Arsenal”.
Gool FM.