(PSG) 20 Nof 2018. Clarence Seedorf ayaa aaminsan in xidiga reer Brazil ee Neymar Jr uu ku qaldamay ka tagista kooxda Barcelona, si uu ugu biiro Paris Saint-Germain.
Kahor kulanka saaxiibtinimo ee xulalka Brazil iyo Cameroon ay caawa oo Talaado ah wada ciyaari doonaan ayuu halyayga xulka qaranka Holand wareysi uu ku bixiyay wargeyska “Sport” ee gobolka Catalonia wuxuu kaga hadlay xidiga kooxda PSG ee Neymar Jr.
“Tayada Neymar Jr waa midaan shaki ku jirin, balse wuxuu u baahan yahay koox ka caawisa inuu sii hormariyo qaab ciyaareedkiisa”.
“Si uu u soo bandhigo qaab ciyareedkiisa ugu fiican, wuxuu u baahan yahay koox si weyn u caawisa, sababtoo ah ma sameyn karo isaga kaligiis”.
“Waxay ahayd qalad weyn inuu sidan dhaqsida ah kaga dhaqaaqo kooxda Barcelona, wuxuu bixin lahaa qaab ciyaareed cajiib ah hadii uu u sii ciyaari lahaa laba xili ciyaareed kale, wuu kala duwanaan lahaa, lakiin haatan wuxuu joogaa Paris Saint-Germain”.
“Neymar Jr wuxuu u baahan yahay macalin siin kara waxa uu u baahan yahay, sababtoo ah wali waa xidig da’ayar ah, wuxuu u baahan yahay inuu ka garab ciyaaro ciyaartoy ka wanaagsan isaga, kama hadlayo inay kaga fiican yihiin farsamo ahaan, balse waxaan kala jeedaa kuwa ku soo guuleestay waxyaabo badan ee muhiim ah”.
Gool FM.