(Yurub) 13 Feb 2019. Weeraryahanka kooxda Paris Saint-Germain iyo xulka qaranka France ee Kylian Mbappé ayaa ugu baaqay saxaafada caalamka iyo taageerayaasha kooxdiisa inay joojiyaan cabsida ay ka qabaan dhaawacyada xidigaha PSG oo ay ka mid yihiin Edinson Cavani iyo Neymar da Silva.
Kooxda PSG ayaa guul 2-0 ah kaga soo gaartay Manchester United garoonkeeda Old Trafford, kulankii lugta koowaad wareega 16-ka ee tartanka Champions League, halka kulanka lugta labaad lagu ciyaari doono garoonka Parc des Princes 6-da bisha soo aadan ee Maarso.
Shabakada BBC ayaa shaacisay wareysi uu bixiyay Kylian Mbappé ciyaarta kadib waxyaabihii uu ka hadlayna waxaa ka mid ahaa:
“Waa guul aad u fiican, balse waxaa ka sii fiican inaan u gudubno wareega xiga, waxaan dhameystirnay qeybtii hore oo kaliya, waana inaan sii wadnaa inaan si aad ah u shaqeyno”.
“Waxaan sameynay khaladaad 20-kii daqiiqo ee ugu dambeysay ciyaarta”.
“Arita ku aadan dhaawacyada sida Neymar iyo Cavani?” waa inaan joojino iibinta cabsida. Jawaabta saxda ah had iyo jeer waa garoonka dhexdiisa”.
“Waxaan taageeri doonaa Lyon kulanka Barcelona ee isbuuca soo socda, waa in kubada cagta Faransiiska ay u gudubto meesha ugu macquulsan ee tartanka Champions League”.
Gool FM.