(Madrid) 17 Maajo 2019. Kooxda kubadda cagta Real Madrid ayaa la soo warinayaa inay doonayso laacibka garabka uga ciyaara Naadiga Lille ee Nicolas Pepe, kaasoo ay rabto inay ka dhigato bartilmaameedkeeda ugu macquulsan xagaagan.
23-sano jirkaan ayaa la la xiriirinayaa tiro ka mid ah kooxaha waa weyn ee qaaradda Yurub kaddib bandhiggiisii cajiibka ahaa ee xilli ciyaareedkan, waxaana uu dhaliyey 20 gool, isla markaana abuuray 11 gool oo kale kaliya 36 kulan oo uu ciyaaray horyaalka Ligue 1.
Kooxo ay ku jiraan Arsenal iyo Liverpool ayaa horay u xiisaynayey xiddigan Pepe, laakiin muddooyinkii dhowaa waxaa aad u doonaysay oo hoggaanka u haysatay tartanka loogu jiray saxiixa laacibkan kooxda Manchester United.
Yeelkeede, Wargeyska Daily Mail ayaa iminka ku waramaya in Real Madrid ay hadda ku darsatay isaga liiska suuro-galka ah ee ay suuqa ka doonayso, maadaama ay xagaagan rabto inay shaxdeeda isbedel weyn ku sameyso.
Real Madrid waxaa bartilmaameed sare u ah ciyaaryahan Eden Hazard, laakiin ganaaxa suuqa ka saaran kooxda Chelsea ayaa ku qasbay inay bilaabaan inay ka fikiraan bedelka xiddiga reer Belgium.
Labada weeraryahan ee kooxda Liverpool, Sadio Mane iyo Mohamed Salah ayaa loo qoondeeyay doorashooyin kale, laakiin Pepe ayaa ah weeraryahankii ugu dambeeyay ee la la xiriiriyo kooxda reer Spain ee Los Blancos.
Xiddiga xulka qaranka Ivory Coast ayaa kooxda Lille ku soo biiray sanadkii 2017-kii, waxaana uu dhaliyey 35 gool 77 kulan oo uu kooxdan u saftay tartammada oo dhan tan iyo markaas.
Gool FM.