(Paris) 02 Agoosto 2019. Xiddiga kooxda kubadda cagta Paris Saint-Germain ee Kylian Mbappé ayaa carabka ku adkeeyay sida uu u xiiseenayo inuu sii joogo saaxiibkiis Neymar Jr garoonka Parc des Princes xili ciyaareedka cusub ee 2019/2020.
Waxaa jira warar badan ee la xiriirinaya xiddiga reer Brazil inuu dib ugu laabanayo kooxdiisii hore ee Barcelona inta lagu gudi jiro suuqan kala iibsiga ee xagaaga.
Neymar Jr ayaa laba xili ciyaareed kahor wuxuu u dhaqaaqay kooxda reer France ee Paris Saint-Germain, kaddib markii ay bixisay qiimaha lagu kansalay heshiiskii uu ku joogay garoonka Camp Nou ee gaarsiisnaa 222 milyan euro.
Agaasimaha ciyaaraha PSG ee reer Brazil Leonardo ayaa sheegay in kooxda ay diyaar u tahay inay u ogolaato 27 jirka reer Brazil inuu baxo hadii dalab ku haboon laga soo gudbiyo.
Waxaa la fahamsan yahay in Barcelona ay dooneyso inay qeyb kaga dhigto magacyo dhowr ee ah xiddigaha ka tirsan kooxdeeda, heshiiska uu Neymar Jr dib ugu soo laabanayo garoonka Camp Nou, laakiin PSG kaliya waxay dooneysaa inay lacag hesho.
Hadaba 20 jirka reer France iyo kooxda Paris Saint-Germain ee Kylian Mbappé ayaa saxaafada u sheegay:
“Waxaan doonayaa inuu joogo, waxaan u sheegay waxa maskaxdeyda ka dhex guuxaya ee ku saleysan xaaladiisa, wax walba wey ii cadahay aniga ahaan”.
“Waa ciyaaryahan muhim ka ah halkan, waxaana doonayaa inuu sii joogo” ayuu hadalkiisa ku soo xiray Kylian Mbappé
Gool FM.