(Paris) 03 Sebt 2019. Xiddiga reer Argentina ee Mauro Icardi ayaa ka hadlay ku biiritaankiisa kooxda Paris Saint-Germain, isaga oo muujiyay sida uu ugu faraxsan yahay inuu xirto maaliyada kooxda heysata horyaalka Faransiiska.
Mauro Icardi ayaa kaddib heshiiska uu ugu biiray kooxda Paris Saint-Germain wuxuu fariin rajo galin ah u diray taageerayaasha garoonka Parc des Princes.
Inter Milan ayaa si rasmi ah ugu dhawaaqday xalay in Mauro Icardi uu ugu wareegay kooxda Paris St Germain heshiis hal xili ciyaareed oo amaah ah, iyadoo heshiiska uu qeyb ka yahay dooqa ay kuwada iibsan karto xagaaga soo socda.
Haddaba Mauro Icardi ayaa ka hadlay dareenkiisa kaddib marka uu saxiixay heshiiska cusub ee kooxda Paris Saint-Germain wuxuuna yiri:
“Waxaan uga mahadcelinayaa Paris Saint-Germain kalsoonida ay i muujiyeen, waxaan sameyn doonaa inta karaankeyga ah ee ugu macquulsan, sidii aan kaga caawin lahaa kooxdeyda cusub inay meel fiican ka gaaraan tartamada oo dhan”.
“Paris Saint-Germain waxaay soo jiidatay ciyaartoy aad u wanaagsan sanadihii u dambeeyay, himilooyinku aad ayeey u sarreeyaan”.
“Ma sugi karo inta aan ka soo muuqanayo garoonka Parc des Princes, kaasoo can ku ah quruxda iyo xamaasada” ayuu hadalkiisa ku soo xiray xiddiga reer Argentina ee Mauro Icardi.
Gool FM