(Paris) 25 Nof 2019. Weeraryahanka Kooxda Paris Saint-Germain ee Kylian Mbappe ayaa shaaca ka qaaday laacibka u qalma inuu sanadkan ku guuleysto abaal-marinta xiddiga ugu fiican adduunka ee Ballon d’Or.
Kylian Mbappe ayaa ku taageeray xiddiga Kooxda Barcelona ee Lionel Messi inuu ku guuleysto abaal-marinta Ballon d’Or ee la bixin doono bilowga bisha soo socota.
Ku guuleystaha abaalmarintan, kaasoo loo aqoonsan yahay ama loo arko inuu yahay ciyaaryahankii ugu wanaagsanaa sanadkii la soo dhaafay ayaa lagu dhawaaqi doonaa 2-da bisha December inta lagu guda-jiro xaflad ka dhacaysa Waddanka Faransiiska.
Mbappe, kaasoo ku jira liiska musharraxiinta abaal-marinta sanadka 2019 kaddib markii uu ku dhammeystay kaalinta afaraad sanadkii hore ee 2018 ayaa sheegay in Messi uu u qalmo in lagu abaal-mariyo waxqabadkiisii sanadka oo dhan.
Isagoo la hadlayey Spiegel Weeraryahankii hore ee Kooxda Monaco ayaa yiri: “Marka la eego shaqsiyadda, Messi ayaa ugu fiicnaa sanadkaan.”
Kabtanka xulka qaranka Argentine ee Leo Messi ayaa abaal-marintan horay ugu guuleystay shan jeer, laakiin markii ugu dambeysay oo uu qaado waxay ahayd sanadkii 2015-kii, Cristiano Ronaldo ayaana markaas kaddib si xiriir ah u qaaday abaal-marintan sanadihii 2016 iyo 2017, halka sanadkii la soo dhaafay ee 2018 uu ku guuleystay laacibka kooxda Real Madrid ee Luka Modric.
Gool FM.