(Paris) 23 Mar 2020. Sida wararku ay sheegayaan waxaa jira tababare doonaya inuu horyaalka Premier League keeno daafaca Thiago Silva.
Macallin Carlo Ancelotti ayaa doonaya inuu suuqa xagaaga u soo kaxaysato kooxda Everton kabtanka Paris Saint-Germain ee Thiago Silva.
35-sano jirkaan ayaa ka mid ah xiddigaha furaha u ahaa kooxda haysata horyaalnimada Faransiiska intii lagu guda jiray xilli ciyaareedkii 2019-20, waxaana uu u saftay 30 kulan tartammada oo dhan oo ay ku jiraan lix kulan oo tartanka Champions League ah.
Xiddiga xulka qaranka Brazil ayaa heshiiskiisa Paris waxa uu ku eg yahay dhammaadka bisha June, si kastaba ha noqotee, waxa ay u muuqataa inuu si bilaash ah kaga tagayo xagaagan kooxda uu hoggaamiyo macallin Thomas Tuchel.
Sida uu warinayo Warsidaha la yirahaado Sportal Tababaraha kooxda Everton ee Carlo Ancelotti, kaasoo xiddigan ka soo jeeda Koonfurta Ameerika ku soo maamulay kooxda PSG , waxa uu soo dhaweynayaa fikradda ah in daafacan dhexe ee khibradda leh uu ku imaanayo garoonka Goodison Park.
Warbixinta ayaa sidoo kale sheegaysa in Silva ay u badan tahay inuu go’aansado mustaqbalkiisa inta lagu jiro xilliga laga nasanayo kubada cagta, waxaana la sheegay inuu u furan yahay fikirka ah inuu xirfaddiisa ciyaareed ku soo gabagabeeyo horyaalka Premier League.
Daafacan qibradda leh ayaa ku guuleystay 20 koob oo maxalli ah intii uu la joogay Les Parisiens.
Gool FM.