(Barcelona) 13 Abril 2020. Goolhayaha kooxda Ajax ee Andre Onana ayaan meesha ka saarin suurtagalnimada inuu ku laabto Barcelona, iyadoo la sheegayo inay PSG xiiseynayso goolhayahan cajiibka ah.
Sida laga soo xigtay L’Equipe, Kooxda PSG ayaa isha ku haysa 24-sano jirka reer Cameroon, laakiin dhaqaaqa noocan oo kale ah wuxuu dhib ku noqon karaa jiritaanka Kaylor Navas, qaabkiisii aan caadiga aheyn ee Sergio Rico oo ay amaah kaga soo qaateen Sevilla iyo Alphonse Areola oo amaah ku jooga kooxda Real Madrid lana filaayo inuu dib ugu soo laabto kooxdiisa PSG.
Kooxda Chelsea ayaa sidoo kale la la xiriiriyay inay u dhaqaaqayso Onana, iyadoo goolhayaha joogtada ah ee Kepa Arrizabalaga mustaqbalkiisa mugdi ku jiro, maadama laga waaye hannaankiisa wacnaa uu haystay xilli ciyaareeddkii hore.
“Sidaan horeyba u iri, Barca waa gurigeyga, haddii ay tahay inaan ku laabto, dib ayaan u laaban doonaa, laakiin maanta weli waan ka fogahay, waxaan ahay goolhayaha Ajax waan arki doonaa waxa dhaca dhammaadka xili ciyaareedkan” waxa uu sidaas u sheegay majaaladda Canal + Afrique.
“Waxaan kaliya daryeelaa ciyaarta kubadda cagta, waxa ka dhaca garoonka, inta hartayna waa wakiiladayda maamula.”
Onana wuxuu mustaqbalkiisa ciyaareed ka bilaabay kooxda Barcelona sanadkii 2010-kii ka hor inta uusan u dhaqaaqin Ajax sanadkii 2014-kii.
Wuxuu door muhiim ah ka ciyaaray Ajax u soo bixitaankeeda afar dhammaadka Champions League ee xilli ciyaareedkii 2018-19.
Dhanka kale Barcelona ayaa sii wadaysa inay wadahadallo qandaraas cusub ah kala gasho gool hayaha dooqa koowaad, Marc-Andre ter Stegen.
Ilo ku dhow kooxda ka dhisan gobolka Catalan ayaa u sheegay Goal bishii hore in Ter Stegen uu doonayo inuu ku helo mushahar sanadeed ah 15 milyan euro sanadkii oo u dhiganta 13 milyan oo gini ama 17 milyan oo dollar, xirmadan mushaharka ayaa ka dhigi doonta mid ka mid ah xiddigaha ugu mushaharka badan Camp Nou, iyadoo kabtanka kaliya ee Lionel Messi ka sarreeyo isaga.
Si kastaba, goolhayahan u dhashay dalka Cameroon ee Andre Onana ayaa kooxda Ajax u saftay 122 kulan tartamada oo dhan tan iyo markii uu ku soo biiray kooxdan.
Gool FM.