(Manchester) 20 Abril 2020. Laacibka garabka weerarka uga ciyaara kooxda Barcelona ee Ousmane Dembele ayaa la soo warinayaa inuu wada sheekeysi la yeeshay Anthony Martial, taasoo ku saabsan u wareegista Kooxda Manchester United.
22-sano jirkaan ayaa ku qaatay xilli isku dhaf ah garoonka Camp Nou tan iyo sanadkii 2017-kii, taasoo keentay in si joogto ah loo hadal hayo mustaqbalkiisa Kooxda reer Catalan.
Isku soo wada duuboo, heshiiska ayaa ah in Barca oo ula soo saxiixatay Dembele bedelkii Neymar ay diyaar u tahay inay dhinac u diraan xiddiga reer France oo ay iska fasaxaan maadaama ay dhaawacyo ku soo noq-noqdeen.
Sida uu warinayo Wargeyska Sport, Dembele ayaa la hadlay ninka ay isku Waddanka yihiin ee Martial, waxaana uu kala sheekeystay faa’iidooyinka iyo khasaarooyinka in la matalo Kooxda Manchester United.
Kooxda Premier League ka dhisan ayaa la sheegay inay ka fiirsanayso qaabkii ay lacag ugu soo iibsan lahayd gooldhaliyahan, iyadoo la rajeynayo inuu ka soo kabsado dhaawac weyn oo muruqa ah bilaha soo socda.
Iyagoo ka warqaba inay Barcelona ku farxi karto inay ku iibiso xiddigan lacag aad u jaban, Kooxda Arsenal ayaa sidoo kale la sheegayaa inay isha ku hayso xaaladda.
Gool FM.