(Turin) 23 Abril 2020. Kooxaha Manchester City, PSG iyo Bayern Munich ayaa dhammaantood bartilmaameedsanaya xiddiga garabka uga ciyaara Naadiga Juventus ee Douglas Costa, sida uu warinayo Warsidaha Corriere dello Sport.
Kooxda ka dheesha horyaalka Serie A ayaa u furan inay iska iibiso Costa xagaagan, iyadoo lagu qiimeeyo adduun dhan 40 milyan oo euro.
Xiddiga xulka qaranka Brazil ayaa bandhig wacan aan u sameynin kooxda ugu sarreysa horyaalka Serie A, waxaana kaliya uu u dhaliyey labo gool tartammada oo dhan xilli ciyaareedkaan, iyadoo fasal ciyaareedkiisa ay la dageen dhaawacyo soo noqnoqday.
Man City ayaa lagu soo warramayaa inay xiiseynayso Costa ilaa iyo haatan, waxaana ay kor u qaadeen suurto-galnimada ay u dhiibi karaan oo ay qeyb uga dhigi karaan saaxiibkiisa reer Brazil ee Gabriel Jesus heshiis isdhaafsi ah.
Laakiin Kooxaha reer Yurub iyo Kooxdii hore ee Costa, Bayern Munich ayaa sidoo kale ku lug leh ugaarsiga loogu jiro xiddigan garabka ka ciyaara.
Dabcan Costa waxa uu horey ula soo shaqeeyey Pep Guardiola, isagoo maamulay sanadkiisii ugu dambeeyay ee Bayern.
Gudaha dalka Jarmalka, Costa waxa uu caddeeyay inuu si aad ah waxtar ugu lahaa ka hoos ciyaaridda Tababare Pep, wuxuuna diiwaan-geliyay 14 caawin 27 kulan oo kaliya.
Sidoo kale kooxaha doonaya Douglas Costa waxaa ka mid ah kooxda xafidanaysa horyaalnimada Faransiiska ee PSG.
Gool FM.