(Paris) 27 Agoosto 2020. Ciyaaryahanka khadka dhexe ee kooxda Manchester United Paul Pogba ayaa laga helay caabuqa Korona Fayras, waxaana laga saaray liiska xiddigaha xulka qaranka Faransiiska oo markii hore lagu daray.
27-sano jirkaan ayaa loo magacaabay oo ku jiray liiska xiddigaha xulka qaranka Faransiiska ee ciyaari doona kulammada ku soo aaddan ee UEFA Nations League bisha soo socda, laakiin hadda waa laga saaray markii laga helay Kofid 19.
Tababaraha xulka qaranka Faransiiska ee Didier Deschamps ayaa warkan xaqiijiyey wxaana uu sheegay inuu Pogba ka saaray liiska xulka qaranka, isla markaana uu booskiisa ku bedelay Eduardo Camavinga.
Dhinaca kale Xiddiga Kooxda Tottenham ee Tanguy Ndombele ayaa isna sidoo kale laga helay caabuqa Korona Fayras.
Xulka qaranka Faransiiska ayaa sida uu qorshuhu yahay dhiggooda Sweden kula ciyaari doona Solna 5 bisha September, halka magaalada Paris ay kula ciyaari doonaan Croatia 8 isla bishaas September.
Gool FM.