(Paris) 10 Dis 2020. Weeraryahanka kooxda Paris Saint-Germain ayaa mar kale qabsaday cinwaannada suuqa kala iibsiga kaddib markii uu ka hadlay mustaqbalkiisa ciyaareed ee kooxda PSG.
Laacibkan ayaa xaqiijiyay inuu doonayo baaqi ku sii ahaanshaha kooxda reer France kaddib ciyaartii ay xalay kooxdiisa ka adkaatay naadiga Istanbul Basaksehir.
Neymar ayaa maalmo ka hor ka dhawaajiyay inuu jeclaan lahaa la ciyaarista Lionel Messi markale, isagoo carrabka ku dhuftay inay sanadka dambe wada ciyaari doonaan.
“Aad ayaan ugu faraxsanahay Paris” ayuu xiddiga reer Brazil u sheegay RMC Sport, waxaana uu sii raaciyay inuu ku faraxsan yahay xiddigaha uu kooxda ku heysto iyo inaysan maskaxdiisa marna soo marin ka tagista PSG.
“Inaan halkan ka tago marnaba ma aysan soo galin maankeyga, waan wada hadli doonaa, waan ku faraxsanahay halkan, waana arki doonaa waxa dhaca” ayuu hadalkiisa ku sii daray weeraryahankii hore ee Santos.
28-jirkan ayaa dhowr jeer lala xiriiriyay inuu dib ugu laabto Barcelona oo uu ka hayaamay xagaagii 2017, balse wali ma aysan soo dhalaalin sheeko dhab ah oo arrintaas ku saleysan.
Gool FM.