(Paris) 09 Feb 2021. Xiddiga reer Talyaani iyo kooxda Paris Saint-Germain ee Marco Verratti ayaa xaqiijiyay inuu jeclaan lahaa in Lionel Messi uu ku biiro PSG, isagoo taasi ku tilmaamay inay u noqon laheyd hadiyad kaga timid kubadda cagta.
Mustaqbalka Lionel Messi ayaa ah arinta ugu muhiimsan ee dhanka warbaahinta waqtiyadan dambe, sababa la xiriira in heshiiskiisa kooxda Barcelona uu dhacayo dhamaadka xilli ciyaareedkaan, ilaa iyo haatanna ma jiraan wax wada hadalo ah ee u socda labada dhinac si loo cusbooneysiiyo qandaraaska.
Haddaba wargeyska “Marca” ee dalka Spain ayaa wuxuu shaaca ka qaaday wareysi uu bixiyay Marco Verratti, waxaana hadaladiisa ka mid ahaa:
“Dabcan waxaan doonayaa inaan ka garab ciyaaro Messi, waxaan doonayaa inaan kubadda siiyo Neymar iyo Messi, isla markaana aan joogo dhabarkooda oo aan eego.”
“Waxay noqon laheyd wax weyn in kooxda lagu dhex haysto Messi, waxay ii noqon laheyd hadiyad kale oo kubadda cagta ah.” Ayuu yiri Marco Verratti.
Gool FM.