(Paris) 09 Maarso 2021. Tababaraha kooxda Paris Saint-Germain ee Mauricio Pochettino ayaa tilmaamay in kooxdiisu ay kulanka Barcelona ku soo gali doonto sida natiijada inay tahay 0/0.
Dhinaca kale Mauricio Pochettino wuxuu carabka ku adkeeyay in Barcelona ay tahay koox weyn, isla markaana ay waajib tahay inay si xoogan ugu diyaar garoobaan kulankan.
Paris Saint-Germain ayaa guul weyn oo 1-4 ah kaga soo gaartay kooxda Barcelona garoonka Camp Nou, balse labada kooxood ayaa habeen dambe Arbacada ku wada ciyaari doona kulanka lugta labaad wareega 16-ka ee tartanka UEFA Champions League garoonka Parc des Princes.
Haddaba Mauricio Pochettino oo ka soo muuqday shir jaraa’id kahor kulanka Barcelona, ayaa wuxuu yiri:
“Waxaa jira 90 daqiiqo oo la ciyaarayo, waana inaan si fiican u shaqeynaa.”
“Anaga ahaan, kulanka wuxuu ku bilaaban doonaa natiijo 0/0 ah. Waxaa jira 90 daqiiqo wax walbana way dhici karaan, marka waa inaad diyaar ahaataa oo feeljignaan.”
“Waa inaan diirada saarnaa daqiiqada ugu horeysa ilaa daqiiqada ugu dambeysa.”
“Waan ognahay in Barcelona ay dhawaan muujisay adeeg iyo hormar, laakiin waxaan sugeynaa nafteena, iyo waxa aan ku soo bandhigi doono garoonka dhexdiisa, qaabka diyaar garowga run ahaantii wuxuu noqon doonaa mid ka duwan sidii hore, marka loo eego awooda kooxda naga soo horjeeda.”
“Tartan walba wuu ka duwan yahay midka kale, isma bar-bardhigi karno Champions League-ga iyo horyaalka Faransiiska, waxa ugu muhiimsan waa habka aan u ciyaareyno, Shaki la’aan, waxaan eegaynaa natiijada kooxda naga soo horjeeda, waana ognahay in Barca ay tahay koox weyn. Laakiin waa inaan diiradda saarnaa nafteena.”
Gool FM.