(Madrid) 22 Maarso 2021. Daafaca reer France iyo kooxda Real Madrid ee Raphaël Varane ayaa xaqiijiyay inuu rajeynayo inuu ka garab ciyaaro ciyaartoyda adduunka ugu fiican, isagoo carabka ku adkeeyay in Kylian Mbappé uu ka mid yahay.
Magaca Kylian Mbappé waxaa lala xiriiray inuu u dhaqaaqayo kooxda Real Madrid, kaddib qaab ciyaareedkiisa cajiibka ahaa uu ku soo bandhigay kooxda kubadda cagta ee Paris Saint-Germain.
Haddaba wargeyska “Daily Mail” ee dalka England ayaa wuxuu shaaca ka qaaday wareysi uu Raphaël Varane kaga hadlay xiddiga PSG ee Kylian Mbappé, wuxuuna yiri:
“Kylian Mbappé waa xiddig da’ayar ah, laakiin wuxuu sameeyay hormar aad u weyn, wuxuuna sii wadaa hormarka.”
“Wuxuu noqday ciyaaryahan dhameystiran, walina waa gooldhaliye, mid kamid ah kuwa ugu fiican.”
“Ujeedkeyga waa inaan ka garab ciyaaro ciyaartoyda ugu fiican, Kylian waa mid ka mid ah ciyaartoyda ugu fiican kubadda cagta Yurub.”
Si kastaba h ahaatee, Kylian Mbappé ayaa u dhaqaaqay kooxdiisii haatan, Paris Saint-Germain, 2018 isagoo ka yimid kooxdiisii hore ee Monaco, tan iyo markaasna wuxuu ka qeyb galay 160 kulan oo PSG ah tartamada oo dhan, wuxuu dhaliyay 120 gool, isaga oo ka caawiyay saaxiibadiis 59 gool.
Gool FM.