(Paris) 04 Abril 2021. Neymar Jr ayaa hakad geliyey wadahadalladii heshiis kordhinta ee uu kula jiray kooxda PSG, waxaana wararku ay sheegayaan inuu diyaar u yahay inuu dib ugu soo labanayo Barcelona.
Inuu hakad geliyey wadahadalladii heshiis cusboonaysiinta ee uu kula jiray Kooxda reer France ee Paris Saint-Germain ayaa ka dhigan baa la leeyhay inuu isagu diyaar u yahay inuu dib ugu laabto Barcelona oo uu dib ula midoobo saaxiibkiis Lionel Messi oo ka fikiraya inuu sii joogo Barca.
29-sano jirkaan ayaa u furnaa rabitaankiisa ah inuu la midoobo xiddiga reer Argentine, iyadoo warbixino badan oo soo baxayey bilowgii sanadka ay la xiriirinayaan Messi inuu u dhaqaaqayo PSG.
Si kastaba ha ahaatee, wargayska Catalan ee Ara ayaa ku warramaya in Neymar aanu rumaysnayn oo kaliya in Messi qalinka ku duugi doono heshiis cusub oo uu ku sii joogayo Camp Nou, laakiin sidoo kale waxay xusayaan in ciyaaryahanka reer Brazil uu ku wargaliyay Barcelona inuu diyaar u yahay inuu ku laabto kooxda.
Tani waxa ay la jaanqaadaysaa hadalladii uu sheegay indha indheeyihii hore ee Barcelona, Andre Cury.
“Neymar markale ayuu la ciyaari doonaa Messi, ma’ahan PSG, laakiin waa Barcelona” ayuu Cury u sheegay Warsidaha El Litoral.
Ku soo laabashada Neymar ee Barcelona way adkaan lahayd marka loo fiiriyo xaaladda dhaqaale ee kooxda, inkastoo uu diyaar u yahay inuu naftiisa u huro si uu dhabarka uga riixo inuu u dhaqaaqo kooxda reer Spain.
Dhinaca kale Agaasimayaasha Blaugrana ayaan meesha ka saareynin soo laabashadiisa, laakiin sidoo kale waxay il gaar ah ku hayaan weeraryahanka Kooxda Borussia Dortmund ee Erling Haaland iyo weeraryahanka Inter Milan ee Lautaro Martinez.
Gool FM.