(Paris) 09 Abriil 2021. Tababaraha kooxda Paris Saint-Germain ee Mauricio Pochettino ayaa sharaxaad ka bixiyay wararka ku saabsan in weeraryahankiisa reer France Kylian Mbappé uu u wareegayo Real Madrid xagaaga soo socda.
Kylian Mbappé ayaa lala xiriirinayay inuu u dhaqaaqayo Real Madrid xagaaga soo socda, maadaama uu si weyn u xiiseynayo adeegiisa madaxweynaha kooxda Florentino Perez, xilli Mbappé qandaraaskiisa PSG uu dhacayo xagaaga 2022.
Wargeyska “AS” ee dalka Spain ayaa wuxuu shaaca ka qaaday hadalada Mauricio Pochettino, mar uu ka hadlayay wararka Kylian Mbappé la xiriirinaya kooxda Real Madrid waxaana hadaladiisa ka mid ahaa:
“Waa wax aan caadeysanay, markaan ka hadlayno ciyaartoy waa weyn sida Mbappé, waa wax dabiici ah inay ku hareeraysan yihiin warar xan ah.”
“Waxa ugu muhiimsan ayaa ah in Kylian Mbappé uu dagan yahay, wuxuu diirada saarayaa bar-tilmaameedyadiisa anaga ah.”
“Wax badan ayuu qaan gaaray inkasta oo uu da’ayar yahay, sidaan sheegay, kooxda iyo ciyaaryahanka waxay xooga saarayaan inay heshiis gaaraan, wuxuu sii joogi doonaa sanado badan, tani waa rabitaanka kooxda.”
“Wax walba oo ka dhacaya hareerahiisa ee la isla dhexmarayo waa wax aanan xakamayn karin.”
Gool FM.