(Liverpool) 06 Luulyo 2021. Liverpool ayaa lagu soo warramayaa inay kala wareegtay Real Madrid kooxda ugu cad-cad saxiixa Weeraryahanka Paris Saint-Germain ee Kylian Mbappe.
Xiddiga xulka qaranka Faransiiska ayaa qandaraaskiisa uu dhacayaa sanad kaddib, waxaana uu dhawaan su’aal ka keenay in PSG ay weli tahay kooxda ku habboon isaga.
Real Madrid ayaa muddo dheer loo tixgelinayay inay tahay kooxda ugu cad-cad helitaanka Mbappe, laakiin Jariiradda The Mirror ayaa sheegeysa in Liverpool ay haatan ku sugan tahay safka hore ee tartanka loogu jiro saxiixa xiddigaan.
Warbixinta ayaa intaa ku daraysa in Reds ay diyaar u tahay inay si rasmi ah ugu dhaqaaqdo soo xero-gelinta 22-sano jirkaan haddii aan qandaraaskiisa si dhaqso ah xal loogu helin.
Mbappe ayaa kooxda PSG u dhaliyay 42 gool, isla markaana u caawiyay 10 gool oo kale tartammada oo dhan xilli ciyaareedkii hore, kaasoo ahaa xilli ciyaareedkiisii afaraad ee garoonka Parc des Princes.
Gool FM.