(Paris) 13 Luulyo 2021. Daafaca cusub kooxda kubadda cagta Paris Saint-Germain ee Sergio Ramos, ayaa sheegay inuusan dabaal-degi doonin haddii uu gool ka dhaliyo Real Madrid.
Sergio Ramos oo ah kabtanka taariikhiga ah ee kooxda Real Madrid, ayaa xagaagan u dhaqaaqay Paris Saint-Germain, kaddib markii uu dhacay qandaraaskiisa Los Blancos.
Ramos ayaa la weydiiyay inta uu ku guda jiray shir jaraa’id uu ka soo muuqday, waxa uu sameyn doono haddii uu wajaho Real Madrid, iyo inuu dabaal-degi doono iyo inkale haddii uu gool ka dhaliyo Los Blancos.
Sergio Ramos oo ka jawaabaya su’aashan la weydiiyay ayaa wuxuu yiri:
“Waxaan kaliya ka fekerayaa inaan ku soo bandhigo Paris wax qabad cajiib ah, isla markaana aan si xoogan u caawiyo, waxaan halkaan u joogaa inaan ka soo bilaabo meesha ugu hooseysa, ee ma ihi halyeey.”
“Waxaan rajeynayaa inuu noqon doono sanad fiican, laakiin wajihitaanka Real Madrid, waan arki doonaa waxa dhaca, Madrid waa hubaal had iyo jeer qalbigeyga ayey ku jiri doontaa.”
“Miyaan dabaal-degi doonaa haddii aan gool ka dhaliyo Real? Marnaba taas ma sameyn doono, qalbigeyga ayeey ku jiraan, waxayna mudan yihiin xushmaddaas, xaqiiqdii uma dabaaldegi doono goolka, xitaa guusha, sababtoo ah kooxda iyo taageerayaasha way u qalmaan taas.”
Gool FM.