(Brazil) 16 Luulyo 2021. Xiddigii hore xulka Brazil ee Luís Müller ayaa muujiyay aragtidiisa kaga aadan xiddiga haatan ee Seleção ee Neymar Jr, isaga oo carabka ku adkeeyay inuu aaminsan yahay in qiimaha lagu iibsaday uu yahay mid la buunbuuniyay, sida uu hadalka u dhigay.
Hadalka Luís Müller ayaa wuxuu imaanayaa maalmo yar kaddib markii Brazil ay ku guuldarreysatay tartankii Copa America, kaddib markii xulka Argantina uu kaga adkaatay 1-0.
Sida uu daabacay wargeyska “Marca” ee dalka Spain halyeeyga reer Brazil ee Luís Müller ayaa wareysi uu bixiyay wuxuu ku sheegay:
“Qiimihiisa waa la buun buuniyay, waligiis kuma guuleysan Ballon d’Or, marka uma qalmo qiimaha lacageed ee Paris Saint-Germain ay isaga ku bixisay.”
Luís Müller oo Koobkii Adduunka kula guuleystay xulkiisa qaranka Brazil sanadkii 1994-kii ayaa wuxuu hadalkiisa intaas ku sii daray:
“Labada ciyaaryahan ee ugu muhiimsan tobankii sano ee la soo dhaafay waa Cristiano Ronaldo iyo Lionel Messi, waa labo ciyaaryahan oo waa weyn, sababtoo ah waxay ku muujiyeen garoonka dhexdiisa, qiimaha Neymar uu ku leeyahay banaanka garoonka waa ka weyn yahay kan garoonka.”
Si kastaba ha ahaatee, Neymar Jr ayaa wuxuu kula guuleystay kooxdiisa Paris Saint-Germain horyaalka France Ligue 1 3 jeer, Coupe de France 3 jeer, Coupe de la Ligue 2 jeer, iyo sidoo kale Trophée des Champions oo 3 jeer ah.
Sidoo kale kale Neymar ayaa xulkiisa qaranka Brazil la qaaday ciyaarihii Olympic-da ee ka dhacay Rio de Janeiro 2016, taasoo aheyd biladdii ugu horreysay ee dahab ah taariikhda uu kula guuleysto wadankiisa.
Gool FM.