(Paris) 21 Dis 2016 Donato Di Campli oo ah wakiilka laacibka kooxda PSG ee Marco Verratti ayaa sheegay inuu dalabyo dhawr ah ka helay kooxaha talyaaniga.
24 jirka reer talyaani ayaa lala xiriiriyay kooxda Inter Milan, sidoo kale wargaysyada qaar ayaa daabacay in Chelsea ay u aragto badalka ku haboon ee Oscar oo ku sii jeeda Shiinaha.
Wakiilka Marco Verratti ayaa diiday inuu xaqiijiyo in laacibku uu la sii joogi doono PSG, wuxuuna intaa ku daray inuu dalabyo ka helay kooxaha talyaaniga.
“Shirkada Suning ee iska leh milkiyada Inter waxay rajaynaysaa inay hesho laacib walba oo ka ciyaara aduunka ee ma ahan kaliya Marco Verratti” ayuu yiri wakiilkiisa mar wax laga waydiiyay wararka la xiriirinaya Inter Milan.
“Waxaa jira kooxo badan oo xiisaynaya isaga laakiin arinku wuxuu gacanta ugu jiraa kooxdiisa, ma hubo inuu la sii joogi doono PSG”.
“Laakiin waxaan idiin xaqiijin karaa inuu dalabyo dhawr ah ka helay kooxaha talyaaniga”.
Gool FM