(Paris) 10 Agoosto 2021. Kaddib markii uu Lionel Messi uu si rasmi ah ugu biiray kooxda Paris Saint-Germain maanta, waxa uu soo hor istaagay taageerayaasha kooxda isagoo xiran funaanad cad oo ay xabadka kaga qoran yihiin ereyo ka tarjumaya sida uu ugu faraxsan yahay magaalada Paris.
Leo ayaa lagu soo warramayaa inuu 25 milyan oo euro u helay gunnada saxiixitaanka heshiiska taasoo ka madax bannaan mushaharka uu ku qaadanayo qandaraaskiisa ee ah 35 milyan oo euro.
Messi ayaa isagoo xiran funaanadda sawirkeeda sare ka muuqdo soo hor istaagay taageerayaashii kusoo dhoweeyay caasimadda Faransiiska, waxaana xabadka kaga qoran “Ici c’est Paris” oo la micno ah “Halkan waa Paris”.
Dhinaca kale, Lionel Messi ayaa doortay xirashada lambarka 30-aad ee naadiga PSG isagoo ku maamuusaya lambarkan inuu xirnaa markii uu safanayay ciyaartiisii ugu horreysay ee kooxda koowaad ee Barcelona iyadoo ay xusid mudan tahay in Neymar Jr oo ay saaxiibbo dhow yihiin uu usoo bandhigay lambarka 10-aad.
Gool FM.