(Yurub) 03 Sept 2021. Halyeeyga reer Argentina ee Juan Román Riquelme ayaa shaaca ka qaaday mustaqbalka Lionel Messi kaddib markii uu ka tagay kooxda kubadda cagta Barcelona.
Juan Román Riquelme ayaa xusay in Lionel Messi uu marka hore kula guuleysan doono kooxdiisa cusub ee Paris Saint-Germain tartanka xiisaha badan ee Champions League-ga, kaddibna uu kubadda cagta kaga fariisan doono safka Blaugrana.
Lionel Messi ayaa ka tagay Barcelona xagaagan kadib markii uu dhamaaday heshiiskii uu kula jiray kooxda, wuxuuna ku biiray naadiga reer France ee Paris Saint-Germain.
Sida laga soo xigtay shabakada “ESPN” Halyeeyga reer Argentina ee Juan Román Riquelme ayaa wareysi uu bixiyay wuxuu ku sheegay:
“Ma aqaano haddii ay tahay wax la yaab leh, laakiin dhammaanteen waan ku faraxsanahay inaan aragno Lionel Messi oo ku raaxaysanaya la ciyaarista Kylian Mbappe iyo Neymar Jr.”
“Haddii PSG aysan ku guuleysan karin Champions League hadda, waligood kuma guuleysan doonaan.”
“Waxaan u malaynayaa in Lionel Messi uu kula guulaysan doono Champions League kooxda Paris Saint-Germain, kaddibna uu kubadda cagta kaga fariisan doono Barcelona.”
Waxaa xusid mudan in heshiiska Lionel Messi ee kooxda Paris Saint-Germain uu dhici doono xagaaga 2023-ka.
Gool FM.