(Paris) 20 Sebt 2021. Isku dhex yaac badan ayaa xalay ka jiray garoonka Parc des Princes kaddib markii uu Macallin Mauricio Pochettino uu go’aansaday inuu baddel ku saaro Lionel Messi daqiiqaddii 75-aad ee ciyaartii ay kooxdiisa Paris Saint-Germain 2-1 kaga adkaatay naadiga Lyon.
Marka uu baddelkaas dhacayay, waxay PSG ciyaarteeda mareysay 1-1 barbarro, mana aysan ahayn mid la filayay inuu macallinka reer Argentina baddel ku saaro xiddigii hore ee Barcelona.
Ciyaarta kaddib ayuu Pochettino sharraxay sababta ay isaga iyo shaqaalaha garbihiisa jooga u go’aansadeen go’aanka ay Messi kaga saareen ciyaarta oo barbarro ah.
“Waxaan go’aansannay inaan ciyaarta ka saarno Messi cabsi laga qabo dhaawac soo gaara awgeed” ayuu yiri macallinkii hore ee Tottenham.
“Waxaa innagu soo wajahan ciyaaro muhiim ah, waana inaan isaga ilaalinaa.
“Go’aannadan waxaan u qaadannay kooxda darted, qof walbana waa uu og yahay inaan heysanno xiddigo dhowr ah oo waaweyn” ayuu hadalkiisa kusii daray Macallin Pochettino.
Si kastaba ha ahaatee, Leo ayaanan wali helin goolkiisii ugu horreeyay ee naadiga PSG tan iyo markii uu ku biiray xagaagan isagoo xalay kulankiisii ugu horreeyay ku ciyaaray garoonka kooxdiisa.
Gool FM.