(Madrid) 11 Nof 2021. Waxaa soo baxaysa warbixin layaab leh oo sheegeysa in Kylian Mbappe uu dalbaday in Real Madrid ay shaqada ka cayriso Macallin Carlo Ancelotti, isagoo u sheegay tababaraha ay tahay inay keensadaan haddiiba uu ku soo biirayo.
Weeraryahankan da’da yar ee ka tirsan kooxda Paris Saint-Germain, Kylian Mbappe ayaa la soo warinayaa inuu shuuraddaas adag hordhigay kooxda saxiixiisa doonaysa ee Real Madrid ka hor inta uusan bilaash ugu wareegin suuqa xagaaga ee 2022-ka.
Qandaraaska kooxda PSG ee Kylian Mbappe ayaa ku eg dhammaadka fasal ciyaareedkan, waxaanan muuqan in wax heshiis kordhin ah ay ka wadahadlayaan labada dhinac, taas beddelkeedana uu xiddiga reer France qorsheynayo inuu u dhaqaaqo dhinaca Los Blancos.
Xiddiga ku guuleystay koobka Adduunka ayaa la warinayaan in heshiiska uu ugu dhaqaaqayo Real Madrid uu dhammaystiran yahay, balse uu kaliya waqtigu ka haray.
Warsidaha El Nacional ayaa warinaya in kaliya Mbappe uu u wareegi doono garoonka Santiago Bernabeu haddii la fuliyo shuruuddiisa ah in la cayriyo tababaraha haatan ee Carlo Ancelotti, isla markaana la magacaabo macallinka kooxda Liverpool ee Jurgen Klopp.
22-sano jirkaan ayaa la fahamsan yahay inuu yahay mid muddo dheer la dhacsanaa hab maamulka hoggaamiyaha Jarmalka ah ee Klopp, isagoo sanadkii hore ammaan u jeediyey.
Gool FM.