(Paris) 19 Nof 2021. Macalinka kooxda Paris St Germain ee Mauricio Pochettino ayaa sheegay inay adag tahay in la badelo saddexda xiddig ee Messi, Neymar iyo Mbappe, isaga oo tilmaamay in aanu qiimayn karin ciyaartoydan oo kale, sababa la xiriira inay kala duwan yihiin.
Kooxda Paris Saint-Germain ayaa ku guuleysatay inay si bilaash ah ku hesho adeega xiddiga reer Argentina ee Lionel Messi kaddib markii uu dhacay qandaraaskii uu kula jiray Barcelona.
Paris Saint-Germain waxay leedahay weerar kulul oo ka kooban seddexda weeraryahan ee kala ah Neymar jr, Kylian Mbappé iyo Lionel Messi.
Sida laga soo xigtay wargeyska Faransiiska ka soo baxa ee L’Equipe, Mauricio Pochettino ayaa yiri:
“Saddexda ciyaaryahan ee Neymar, Mbappe iyo Messi, waa kuwa ugu fiican adduunka, waa maxay sababta aad garoonka kaga saareyso?.”
“Xitaa haddii aysan u ciyaarin sidii la filayey, tayada ay saddexdan xiddig leeyihiin ayaa ah mid wax go’aamia waqti kasta, waana sababta ay kooxdu u samaysay dedaal dhaqaale oo aad u weyn si ay ula soo wareegto.”
“Uma qiimeyn kartid ciyaartoydan noocan oo kale ah kubadda cagta sida kuwa kale, sababtoo ah way ka duwan yihiin.”
Gool FM.