(Paris) 29 Dis 2021. Weeraryahanka kooxda kubadda cagta Paris Saint-Germain ee Kylian Mbappe ayaa si cad u xaqiijiyay inuusan ku biireyn naadiga Real Madrid suuqa bisha January ee soo aaddan isagoo caddeeyay inuu 100% ku dhammeysan doono xilli ciyaareedkan la joogista kooxdiisa.
“Wax walba ayaan ku bixin doonaa si aan ugu guuleysanno Champions League, horyaalka iyo koobka dalka, farxad oo dhanna aan wada siiyo taageerayaasha, maxaa yeelay way u qalmaan,” ayuu yiri Mbappé oo la hadlayay barnaamujka Connect the World ee uu Becky Anderson ka qabto hilinka CNN.
Qandaraaska 23-sano jirkan ayaa dhici doona 30-ka bisha June ee 2022 taasoo ka dhigan inuu dhammaadka xilli ciyaareedkan bilaash kaga tagi karo naadigiisa PSG hadduusan heshiis cusub saxiixin, balse waxa uu diiday inuu meesha ka saaro u dhaqaaqista Real Madrid suuqa xagaaga soo aaddan.
Docda kale wareysigan oo ahaa mid dheer, ayuu laacibka xulka Faransiiska kula guuleystay Koobka Adduunka sanadkii 2018 waxa uu Lionel Messi ku tilmaamay xiddigii ugu weynaa kubadda cagta iyo saxiixii ka yaabiyay isboortiga oo idil.
Gool FM.