(Manchester) 13 Jan 2022. Kooxda kubadda cagta Manchester United ayaa u muuqata mid quus ka joogta inay heshiis cusub ka saxiixato xiddigeeda khadka dhexe ka ciyaara ee Paul Pogba taasoo keentay inuusan weli kala caddeyn mustaqbalkiisa Old Trafford kaddib dhammaadka xilli ciyaareedkan markaas oo uu qandaraaskiisu dhacayo.
Si kastaba ha ahaatee, wararkii u dambeeyay ayaa sheegaya inay naadiga Paris Saint-Germain haatan hoggaanka u heyso loollanka loogu jiro saxiixa Pogba sida laga soo xigtay majaladda France kasoo baxda ee L’Equipe, waxaana xusid mudan in laacibkan bilaash lagu heli karo kaddib 30-ka bisha June.
Real Madrid iyo Juventus ayaa sidoo kale aad loola xiriirinayaa kubbad qaabeeyaha xulka qaranka Faransiiska kaasoo dhinaca kale la warinayo inuu miiska u saaran yahay yabooh ay naadigiisa Red Devils ugu kordhineyso qandaraaskiisa.
28-sano jirkan oo dhaawac kasoo gaaray isagoo ku jira tababarka xulka Les Bleus isla markaana garoommada ka maqan tan iyo bishii November ee sanadkii hore ayaa markii labaad xirfaddiisa si xor ah uga tagi kara Man United maadaama uu 2012 beeca xorta ah ugu biiray Juventus.
Gool FM.