(Madrid) 25 Jan 2022. Weeraryahankii hore kooxda Real Madrid ee Fernando Morientes ayaa xaqiijiyay in weeraryahanka Paris Saint-Germain ee Kylian Mbappé uu u wareegi doono garoonka Santiago Bernabeu suuqa xagaaga ee soo socda.
Kylian Mbappé ayaa wuxuu xur u noqday inuu la xaajoodo kooxda Real Madrid tan iyo bilowgii bishan Janaayo, wuxuuna ilaa iyo haatan iska diiday inuu qandaraaska u kordhiyo PSG, maadaama heshiiskiisa haatan uu dhici doono dhamaadka xilli ciyaareedkan.
Weeraryahankii hore kooxda Real Madrid ee Fernando Morientes oo ka hadlayay arintan ayaa wuxuu yiri:
“Kylian Mbappé wuxuu tagi doonaa Real Madrid xagaaga soo socda, Wax badan ayaan u riyaaqay kooxda iyo Florentino Perez.”
“Madaxweynaha aad ayuu u jecel yahay Mbappé, maxaa yeelay waa ciyaaryahan qaas ah, wuxuu u ciyaari karaa sanado badan Real Madrid.”
Mar wax laga weydiiyay suurtagalnimada uu Kylian Mbappé ugu dhaqaaqi karo kooxda Real Madrid ayaa wuxuu ku jawaabay Fernando Morientes: “Waxaan u maleynayaa sidaas.” Tani waxay sidoo kale la jaanqaadeysaa hadalada tababarihii hore kooxda Arsenal ee Arsene Wenger.
Gool FM.