(Paris) 07 Feb 2022. Kaddib guushii xalay kooxda kubadda cagta Paris Saint-Germain ka gaartay naadiga Lille oo ay 5-1 ku xasuuqeen, Kylian Mbappe oo mid ka mid ah goolashaas dhaliyay ayaa la hadlay saxaafadda isagoo soo hadal qaaday arrimaha mustaqbalkiisa iyo wararka la xiriirinaya Real Madrid iyadoo warbaahinta qaar ay warisay inuu heshiis horudhac ah la gaaray Los Blancos isla markaana uu xagaagan si xor ah ugu wareegi doono.
“Waxaan ka fikirayaa inaan Madrid garaaco kaddib ayaan arkeynaa wixii dhaca” ayuu Mbappe uga jawaabay su’aal la xiriirtay mustaqbalkiisa oo la weydiiyay.
“Weli go’aan ma aanan qaadan, xitaa haddii ciyaarta aan Real Madrid la ciyaareyno ay wax baddesho, xitaa anigoo xor u ah inaan sidaas sameeyo [inaan heshiis la gaaro Madrid], haddana ma sameynayo sidaas, ma la xaajoon doono koox aan la loollamayo” ayuu weeraryahanka Faransiiska ah hadalkiisa sii raaciyay.
Dhinaca kale, kooxaha PSG iyo Real Madrid ayaa ku balansan wareegga 16-ka tartanka UEFA Champions League bishan, waxaana ku guuleystaha Koobkii Adduuunka ee 2018 uu ka hor tagayaa kooxda dooneysa inay hesho saxiixiisa.
Gool FM.