(Paris) 15 Feb 2022. Kooxda kubadda cagta Paris Saint-Germain ayaa lagu soo warramayaa inay yabooh cajiib ah usoo bandhigeyso xiddiga Manchester United khadka dhexe uga ciyaara ee Paul Pogba kaasoo Old Trafford uga tagi kara si bilaash ah xagaagan.
Pogba ayaa haatan ku jira afartii bilood ee ugu dambeysay qandaraaskiisa Man United, sidaas darteedna waxa uu xor u yahay inuu heshiis horudhac ah la gaaro kooxaha ka dhisan meel ka baxsan England, inkastoo dhinaca kale uusan wali meesha ka saarin suurogalnimada uu qandaraas cusub ugu saxiixi karo Red Devils.
Wargeyska Daily Mail ayaa sheegay inay kooxda PSG diyaar u tahay inay xiddiga Faransiiska ah usoo bandhigto qandaraas weyn si uu markii ugu horreysay uga ciyaaro horyaalka Ligue 1 taasoo suuro gal ka dhigi karta inuu waayihiisa ciyaareed kusoo gabagabeeyo dalkiisa.
Si kastaba ha ahaatee, kooxda magaalada Paris ka dhisan ayaa loollan kala kulmeysa kooxaha Juventus iyo Real Madrid iyadoo 28-sano jirkan wadar ahaan labadiisa xilli ee Man United uu u saftay 222 kulan isagoo u dhaliyay 39 gool halka uu caawiyay 49 kale.
Gool FM.