(Paris) 16 Feb 2022. Kooxda kubadda cagta Real Madrid ayaa xalay looga adkaaday gool uu xilli dambe ka dhaliyay Kylian Mbappe kaasoo ay aad ugu rajo weyn tahay inuu kusoo biiro xagaagan, waxaana goolkiisii xalay ee ku muujiyay tayadiisa iyo sida uu guulo ugu hoggaamin karo haddii uu ku biiro.
Mbappe ayaa Canal Plus uga jawaabay su’aal la xiriirtay sida uu u dafiray culeyska ku hareersan kulankan xilli mustaqbalkiisa loo badinayo inuu ka shidmi doono caasimadda Spain, waxaana weeraryahanka Faransiiska ah uu ku jawaabay: “Way fududdahay, kaliya waa inaad ciyaartaa kubadda, su’aalo badanaa is weydiinnaa, waxyaabo badanaa sheegnaa, waxaan ka hadalnaa PSG iyo Real Madrid waana labo naadi oo waaweyn, aniga waxaan ahay ciyaaryahan ka tirsan PSG, had iyo jeerna waan ku faraxsanahay”.
23-sano jirkan ayaa hore u xaqiijiyay inuu inta ka harsan xilli ciyaareedkan si buuxdo diiradda u saari doono kooxdiisa Paris xalayna markale ayuu hadalkaas adkeeyay isagoo weliba ku gooddiyay inuu shaqada kulankan ku dhammeystiri doono garoonka Santiago Bernabeu halkaas oo lagu ciyaarayo kulanka lugta labaad.
“Waxaan u ciyaaraa mid ka mid ah kooxaha ugu wanaagsan dunida, waxaana doonayaa inaan 100% geliyo inta ka dhimman xilli ciyaareedkan, kaddib aan aragno waxa dhaca” ayuu hadalkiisa kusii daray Kylian Mbappe.
Gool FM.