(Paris) 03 Maarso 2022. Kooxda kubadda cagta Paris Saint-Germain ayaa dooneysa inay saxiixa weeraryahanka naadiga Bayern Munich ee Robert Lewandowski ku garaacdo dhiggeeda Real Madrid iyadoo diyaar u ah inay ka gudbiso dalab ku kacaya 35 milyan oo euro.
33-sano jirkan ayaa ka mid ah weeraryahannada ugu bandhigga wanaagsan kubadda cagta dunida isagoo 28 gool dhaliyay 24 kulan oo uu Bundesliga saftay xilli ciyaareedkan, balse suuro-galnimada saxiixiisa lagu heli karo ayaa soo jeedisay dareenka kooxaha PSG iyo Real Madrid.
Warsidaha El Nacional ayaa ku warramaya in guddoomihaha PSG ee Nasser Al-Khelaïfi uu ku fikirayo inuu loollanka saxiixa Lewandowski ku garaaco Madrid waxaana uu diyaarinayaa dalab 35 milyan oo euro ah inuu u gudbiyo naadiga Bayern.
Si kastaba ha ahaatee, kabtanka xulka qaranka Poland qandaraaska uu ku joogo garoonka Allianz Arena ayaa dhacaya bisha June ee sanadka dambe balse Al-Khelaïfi ayaa doonaya inuu saxiixa xiddigii hore ee Borussia Dortmund gacanta kusoo dhigo xagaagan maadaama Kylian Mbappe uu si xor ah kaga tagi karo kooxda Paris ka dhisan marka uu dhammaado heshiiskiisa xagaagan.
Gool FM.