(Barcelona) 25 Abriil 2022. Kooxda kubadda cagta Barcelona ayaa weli ku jirta ugaarsiga xiddigaha heshiisyadoodu ay dhammaadka yihiin si ay qiimo hoose ama bilaash ugu soo qaataan, waxayna xagaagan bartilmaameedyadeeda ku dartay xiddiga garabka uga ciyaara Paris Saint-Germain ee Angel Di Maria.
Qandaraaska 34-sano jirkan ayaa dhici doono dhammaadka xilli ciyaareedkan waxaana lala xiriirinayaa inuu bilaash uga tagi doono caasimadda Faransiiska inkastoo ay kooxda PSG heysato fursad ay 12 bilood ugu kordhin karto qandaraaskiisa.
Sida laga soo xigtay warsidaha TYC Sports, Barcelona ayaa dooneysa inay lasoo wareegto laacibkii hore ee naadiga Real Madrid balse waxaa jira loollan xooggan oo ay kala kulmeyso qaar ka mid ah kooxaha qaaradda Yurub.
Warsidaha ayaa intaas ku daray inay sidoo kale Di Maria xiiseynayaan kooxaha Atletico Madrid, Juventus iyo Benfica kuwaasoo qayb ka ah kooxaha doonaya adeegga laacibka reer Argentina.
Waayo-araggan garabka ka ciyaara ayaa horraan usoo ciyaaray kooxda reer Portugal muddo saddex sano ah intii u dhexeysay 2007 illaa 2010 markaas oo uu u dhaqaaqay Los Blancos.
Gool FM.