(Manchester) 12 Luulyo 2022. Manchester City ayaa xiddigeeda Riyad Mahrez ka saartay damacii kooxda Paris Saint-Germain.
Wargeyska Faransiiska ka soo baxa ee L’Equipe, ayaa shaaca ka qaaday in Mahrez uu ku guda jiro sidii uu qandaraaska ugu kordhin lahaa kooxdiisa Man City xagaagan.
Riyad Mahrez ayaa lagu wadaa inuu saxiixo heshiis laba xilli ciyaareed oo dheeri ah, si uu u sii joogo kooxda Ingiriiska ilaa xagaaga 2025-ka.
Dhankeeda, Shabakadda “Foot Mercato” ee Faransiiska ayaa tilmaamtay in Mahrez uu ogolaaday inuu qandaraaska u kordhiyo Man City, xilli lala xiriirinayay u dhaqaaqista kooxda PSG, si uu ugu noqdo badelka Angel Di Maria, oo dhawaan u dhaqaaqay Juventus.
Riyad Mahrez oo 31 jir ah, ayaa weli udub dhexaad u ah safka Manchester City, maadaama uu gacan ka geystay in kooxda ay ku guuleysato horyaalka Premier League 3 jeer.
Xiddiga reer Algeria ayaa sidoo kale u dhaliyay 63 gool, 46 goolna caawiye ka ahaa kooxdiisa Man City, 189 kulan oo uu ciyaaray tartamada oo dhan.
Gool FM.