(Paris) 17 Okt 2022. Xiddiga Paris Saint-Germain ee Kylian Mbappé, ayaa ka hadlay xaqiiqada wararka tilmaamaya inuu doonayo inuu ka tago kooxda Paris bisha Janaayo.
Hadalka Mbappé ayaa yimid kaddib markii uu ka qeyb galay kulankii ay kooxdiisa la ciyaartay Marseille, waxaana kulanka uu ku soo idlaaday guul dirqi ah ay gaartay kooxda Paris Saint-Germain.
Wargeyska “Marca” ee dlaka Spain ayaa soo xigtay hadalada Kylian Mbappé, wuxuuna yiri:
“Aad ayaan ugu faraxsanahay inaan joogo Paris Saint-Germain, waligey ma codsan inaan baxo bisha January, ma fahmin macluumaadka soo baxay, waxaan ula yaabay sida qof kasta oo kale.”
“Waxaa jira dad badan oo u maleynaya inaan ku lug leeyahay, laakiin anigu sidaas ma ihi.”
“Waxaan ahay ciyaaryahan kubada cagta ah, waxa iigu muhiimsan waa inaan ciyaaro, miyaan ka xanaaqsanahay PSG? Haba yaraatee, gabi ahaanba waa khalad, aad ayaan ugu faraxsanahay halkan.”
Si kastaba ha noqotee, Kylian Mbappé ayaa dhawaan heshiis cusub u saxiixay kooxda ka dhisan Paris, laakiin taasi kama hor istaagin inuu sii wado ka hadalka suurtogalnimada ah inuu ku biiri karo Real Madrid mustaqbalka.
Gool FM.