(Barcelona) 31 Okt 2022. Taageerayaasha Barcelona ayaa ku riyoonaya soo laabashada halyeeyga kooxda Lionel Messi markale kaddib markii uu ku biiray Paris Saint-Germain bishii Ogosto ee sanadkii hore.
Wargeysyada Catalonia ayaa soo wariyay in laga yaabo in Messi uu ku laabto garoonka Camp Nou marka uu dhamaado qandaraaska uu kula jiro Parisians dhamaadka xilli ciyaareedkan gaar ahaan bisha June 2023.
Warbixin ay daabacday Football Spain ayaa lagu sheegay in Messi uu go’aan ka gaari doono mustaqbalkiisa kaddib marka uu dhamaado Koobka Adduunka ee Qatar 2022, wuxuuna go’aankiisa noqon doonaa inuu sii joogo oo uu u kordhiyo qandaraaskiisa Paris, ama inuu ku laabto Barcelona.
Warbixinta oo soo xiganeysa CBS Sports, ayaa lagu sheegay in Messi, xitaa haddii uu go’aansado inuusan u cusbooneysiin Paris, uusan kooxda ka tagi doonin bartamaha xilli ciyaareedka bisha Janaayo.
Warbixinta ayaa tilmaamtay in madaxweynaha kooxda Barcelona Joan Laporta uu ka dhawaajiyay suurtagalnimada soo kabashada Messi ee bisha Janaayo, taasoo albaabka u furtay mar kale in laga fikiro soo laabashada Leo ee garoonka Camp Nou.
Messi waxa uu u matalay kooxda koowaad ee Barcelona intii u dhaxaysay 2005 ilaa 2021, waxa uu mudadaas ciyaaray 778 kulan, waxaana uu u dhaliyay 672 gool, isaga oo sidoo kale ka caawiyay saaxiibadiis 303 gool.
Gool FM.