(Doha) 10 Dis 2022. Xulka France ayaa iska xaadiriyay wareega afar dhammaadka koobka adduunka kaddib markii ay kaga adkaadeen dhigooda England 1-2, ciyaar qeyb ka ahayd kulammada wareega siddeed dhammaadka koobka adduunka 2022 ee Qatar.
Qeybta hore ee ciyaarta ayaa lagu kala nastay 0-1 uu ku hoggaaminayay xulka qaranka France.
Daqiiqadii 17-aad xulka France ayaa hoggaanka u qabtay ciyaarta kaddib markii uu 0-1 ka dhigay Tchouameni, waxaana ka caawiyay saaxiibkiis Griezmann.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
54 daqiiqo marka ay ciyaarta mareysay xulka qaranka England ayaa loo dhigay rigoore waxaana gool u badelay H. Kane, ciyaarta ayaa waxay sidaas ku noqotay barbardhac 1-1 ah.
Daqiiqadii 78-aad xulka qaranka France ayaa markale hoggaanka u qabtay dheesha kaddib markii uu 1-2 ka dhigay Giroud oo ay caawin kaga timid Griezmann.
Ugu dambeyntii ciyaarta ayaa ku dhammaatay 1-2 uu xulka qaranka France kaga adkaatay dhigooda England, waxayna u gudbeen wareega xiga ee afar dhammaadka koobka adduunka 2022 ee ka socda dalka Qatar.
Gool FM.