(Paris) 28 Agoosto 2017 Wali waxaa la iswaydiinayaa sababtii ku qasabtay Neymar inuu ka tago Barcelona oo uu aad u jeclaa.
Laakiin TV-ga reer France ee Telefoot ayaa baahiyay sababta dhabta ah ee ku riixday laacibka reer Brazil inuu qaato go’aan niyad jabinaya kooxdiisa.
Barcelona ayaa la soo wareegtay Neymar 2013, maamulka kooxda ayaana ku qanciyay laacibka reer Brazil inuu isagu noqonayo xiddiga ugu sareeya kooxda, maadama la filayay in Messi uu ka tagayo kooxda waqtigaas.
Maamulkii waqtigaas ee Barcelona ayaa rumaysnaa in Messi uusan wax badan la sii joogi doonin kooxda laakiin sidii ay filayeen ma dhicin.
Neymar ayaa sugayay in Messi uu ka tago kooxda laakiin waxay ku qaadatay 4-sano inuu ku jiro hooska laacibka reer Argentina.
Wuxuuna go’aansaday inuu ka tago kooxda waqtigii fasaxa xaggaagan kadib markii uu ogaaday in Messi uu kooxda u saxiixayo heshiis cusub.
Gool FM