(Paris) 19 Sebt 2017 – Qolka lebiska ee Paris Saint Germain ayaa budo noqday iyadoo uu burburay xiriirka laacibiin aasaasi u ah kooxda PSG sida maanta ku dhigan L’Equipe, kaddib markii ay si foolxumo wayni ka muuqato ay iskugu dheceen Cavani iyo Neymar.
Labada laacib ayaa isku haystey kii laadi lahaa rigoore kooxdooda loo dhigay, waxaase ka darrayd inuu hiillo muujiyay Dani Alves taasoo aan ku fiicnayn laacib wayn oo xirfadle iyo waaya arag ah sida isagoo kale.
Haddaba, waloow ay si akhyaarnimo leh arrinta usoo dhexgaleen Thiago Silva iyo Marquinhos, misna waxaa la sheegayaa in ay dhici karto inay PSG u kala jabto 2 qaybood oo kala ah laacibiinta reer Brazil oo dhinac ah iyo inta kale gaar ahaan kuwa Spanish-ka ku hadla oo dhinac kale ah.
Warsidahan ayaa tibaaxaya in uu Cavani oo ka dhiidhinaya waxa dhacay uu u weecan doono dhanka laacibiinta af-Spanish-ka ku hadla ee kooxda iyo intii kale ee uu heli karo, taasoo aan caawin doonin qadiyadda kooxda.
Waxaa kale oo arrinta uga sii daray Neymar Jr oo ka haray asxaabta uu Cavani ku leeyahay bogga Instagtam, iyadoo maamulka PSG ay u taallo inay si deg deg ah oo weliba hufan ay u xalliyaan dagaalka sokeeye ee ka bilowday gondohooda.
Gool FM