(Paris) 18 Feb 2018 Ciyaartoyda kooxda PSG ayaa kulan gaar ah isugu yimid jimcihii kaas oo ay uga hadlayeen guul daradii ka soo gaartay Real Madrid.
PSG ayaa gool la hormartay balse Real Madrid ayaa ugu badashay 3-1 kulan aad u xiiso lahaa oo uu ka maqnaa kabtanka kooxda ee Thiago Silva.
Telefoot ayaa daaha ka qaaday in ciyaartoyda PSG ay kulan gaar ah isugu yimaadeen jimcihii, waxayna kuwada kulmeen xarunta tababarka ee kooxda, kulanka ayaana ahaa mid u gooni ah ciyaartoyda oo uusan ka soo qayb galin tababare Unai Emery.
Waxaa goobta ka hadlay kabtan Thiago Silva, kabtan ku xigeenka kooxda ee Dani Alves iyo waliba Marquinhos, ciyaartoyda ayaana isla qaatay hal go’aan kaas oo ah inay si wada jir ah uga hortagaan Real Madrid kulanka lugta labaad.
Cinwaanka loo bixiyay kulanka ayaa ahaa “Wada jir iyo isku duubni”, waxayna ku balameen in dhamaan ciyaartoyda kooxdu ay 100% xooga saaraan sidii ay koobka uga reebi lahaayeen Real Madrid.
Gool FM