(Paris) 21 Maarso 2018 Neymar ayaa la wadaagay maamulka PSG magaca tababaraha badali doona Unai Emery oo ka tagaya kooxda dhamaadka xiliciyaareed kaan.
PSG ayaa si dhab ah u bilowday raadinta tababarihii badali lahaa Unai Emery kaas oo ku guul daraystay inuu Champions League u qaado kooxda labadii xiliciyaareed ee uu joogay sida ay baahisay AS.
Liiska tababareyaasha ay doonayso PSG waxaa ku jira Diego Simeone, Carlo Ancelotti, Luis Enrique iyo Antonio Conte.
Milkiilaha PSG ee Nasser Al-Khelaifi ayaa safar ku aaday dalka Brazil si uu u hubiyo xaalada caafimaad ee Neymar kadib qaliinkii uu maray iyo inuu kala tashto qorshaha kooxda ee xiliciyaareedka dambe.
Neymar ayaa milkiilaha kala sheekaystay mustaqbalkiisa iyo sidoo kale tababarihii badali lahaa Unai Emery balse Neymar ayaa u sheegay inuu jecel yahay in PSG tababare looga dhigo tababarihiisii hore ee Luis Enrique.
Nasser Al-Khelaifi wali wax go’aan ah ma qaadan sida la sheegay laakiin wuxuu isku dayi doonaa inuu qanciyo laacibkiisa Neymar.
Gool FM