(Paris) 23 Junyo 2019. Daafaca garabka midig xulka qaranka Brazil ee Dani Alves ayaa ku dhawaaqay inuu ka tagayo kooxda Paris St Germain suuqan xagaaga.
Hadalkan kasoo yeeray Dani Alves ayaa wuxuu imaanayaa kaddib markii ay xalay guul 5-0 ah kaga gaareen xulka qaranka Peru, kulankoodii 3-aad Group A ee tartanka Copa America 2019.
Dani Alves ayaa yimid kooxda reer France ee Paris St Germain sanadkii 2017 kaddib markii uu u soo ciyaaray kooxaha Sevilla, Barcelona iyo Juventus, kahor inta uusan go’aansan inuu xagaagan ka tagayo maadaama uu dhamaanayo qandaraaskiisa, balse ma uusan sheegin kooxda uu ku biirayo marka uu ka dhaqaaqo PSG.
Alves oo haatan da’adiisu tahay 36 jir ayaa ku soo qoray boggiisa rasmiga ah ee Instagram-ka ayaa yiri:
“Waxaa dhamaad ah Muddo kale oo xirfaddayda ah, waxaan jeclaan lahaa inaan u mahadceliyo qoyska Paris Saint-Germain, fursada ay inoo siiyeen inaan si wada jir ah u qorno bogga taariikhda kooxda”.
Si kastaba ha ahaatee Dani Alves ayaa kula guuleystay kooxda Paris St Germain 2 jeer ee ah horyaalka France Ligue 1, iyo Coupe de France oo 2 jeer ah, mudada labada xili ciyaareed uu ku sugnaa garoonka Parc des Princes.
Gool FM.