(Paris) 17 Luulyo 2019. Macalinka kooxda PSG Thomas Tuchel ayaa qiray inuu ka war qabay waxa uu ku fikarayay Neymar Jr, kahor inta uusan aadin tartanka Copa America 2019 ee ka dhacay dalka Brazil.
Neymar Jr ayaa ku dhawaaqay inuu doonayo ka tagista kooxda PSG, si uu markale dib ugu laabto Barcelona inta lagu gudi jiro suuqan xagaaga.
Hadaba Thomas Tuchel ayaa wareysi uu bixiyay wuxuu kaga hadlay inuu ogaa waxa uu ku fikarayay Neymar Jr wuxuuna yiri:
“Waan ogaa niyada Neymar Jr kahor Copa America”.
“Wax walba ee inaga dhexeeya waa wax iska cad, hadda sheekada waxay ka dhexeysaa kooxda iyo Neymar Jr, waxaan u shaqeeneysaa si wada jir ah”.
45 jirkaan ayaa dhinaca kale sheegay inuu wali jeclaan lahaa inay sii wada shaqeeyaan Neymar Jr, inkastoo ay jiraan arrimahan oo dhan:
“Mar walba waan ka murugoodaa marka uu ciyaaryahan soo daaho, hadda waxaan la shaqeyneynaa ciyaartoyda, Neymar wuu joogaa, ma aqaano waxa dhici doono”.
“Waa ciyaaryahankeyga, inta uu ku sugan yahay qolka dhar badalashada waa ciyaaryahankeyga, waan la shaqeyn doonaa, waa inaan la qabsanaa wax walba, waa inaan noqonaa kuwo dabacsan” ayuu hadalkiisa ku soo xiray Macalinka kooxda PSG ee Thomas Tuchel.
Gool FM.