(Paris) 19 Dis 2019. Shabakadda caanka ah “CalcioMercato” ee dalka Talyaaniga ayaa shaaca ka qaaday in kooxda reer France ee Paris Saint-Germain ay ku adkeysaneyso inay la soo wareegto xiddiga khadka dhexe ee naadiga Chelsea N’Golo Kanté suuqo kala iibsiga ee xagaaga.
N’Golo Kanté ayaa ku biiray kooxda Chelsea kaddib markii uu Leicester City ku hoggaamiyay hanashada horyaalka Premier League xilli ciyaareedkii 2015/16, isagoo ku guuleystay abaal-marinta ciyaaryahanka ugu fiican horyaalka.
Kanté ayaa u saftay Chelsea 155 kulan ee ah dhamaan tartammada kala duwan, wuxuuna awooday inuu dhaliyo 11 gool, waxaana loo arkaa mid ka mid ah tiirarka ugu waa weyn ee kooxda ka dhisan Galbeedka magaalada London sanadihii la soo dhaafay.
Shabakadda “CalcioMercato” ee dalka Talyaaniga ayaa dhinaca kale xaqiijisay in macallinka PSG ee Thomas Tuchel uu ku wargaliyay maamulka sare ee kooxda in sida ugu dhaqsiyaha badan ay kala soo saxiixdaan N’Golo Kanté Kooxda Chelsea, maadaama uu u arko inuu yahay ciyaaryahanka ugu fiican ee uu ku xoojisan karo khadka dhexe ee kooxdiisa.
Laakiin wararka ayaa waxay intaas ku sii darayaan in Paris Saint-Germain ay loollan adag kala kulmi doonto Kooxaha reer Spain ee Barcelona iyo Real Madrid si ay ula saxiixdaan 28-sano jirkaan reer France ee N’Golo Kanté.
Gool FM.