(Paris) 24 Dis 2019. Weeraryahanka xulka qaranka Faransiiska iyo kooxda Paris Saint-Germain ee Kylian Mbappé ayaa xaqiijiyay in saaxiibkiis u ciyaara naadiga Barcelona ee Ousmane Dembélé uu u sheegay in Lionel Messi uu isaga daawan jiray xilli ciyaareedkii hore , markii ay ku tartamayeen gooldhaliyaha ugu sareeya Yurub xilli ciyaareedkii 2018/2019.
Kylian Mbappé ayaa wareysi uu ku bixiyay Majalada caanka ah ee France Football wuxuu ku sheegay:
“Dhamaadkii xilli ciyaareedkii hore, waxaan u arkaayay inay macquul tahay inaan u tartamo abaal-marinta gooldhaliyaha ugu sareeya Yurub, laakiin qofka aniga ila tartamayay ayaa ahaa Messi”.
“Waxaan dhalin jiray labo gool dhamaadka Isbuuca, balse isaga ayaa wuxuu dhalin jiray saddex gool, marka aan saddex gool dhaliyo, wuxuu isagana la imaan jiray afar gool, tani waxay ahayd waali”.
Ku guuleystihii koobka adduunka 2018-kii oo hadalkiisa sii wata ayaa wuxuu xaqiijiyay inuu la xiriiray saaxiibkiis xulka qaranka France ee Ousmane Dembélé isla markaana uu weydiiyay:
“Si ula kac ah ma u sameeyaa arrintan?”, Ousmane Dembélé ayaa ugu jawaab celiyay “Dabcan, isagu wuu ku daawanayaa”, Mbappé oo hadalkiisa sii wata ayaa wuxuu yiri: “Ma ahan wax xun in Messi uu i daawado”.
Waxaa xusid mudan in Lionel Messi uu ku soo afjaray xilli ciyaareedkii hore tartanka gooldhalinta horyaalka La Liga ee dalka Spain 36 gool, wuxuuna 15 gool ka sareeyay Benzema oo dhaliyay kaliya 21 gool, halka uu saddex gool ka dambeeyay Kylian Mbappé oo isna loo caleemo saaray gooldhaliyaha ugu sareeya horyaalka Faransiiska kaddib markii uu dhaliyay 33 gool.
Gool FM.