(Paris) 24 Dis 2019. Waxaa shaaca laga qaaday Laacibka ku guuleystay abaal-marinta xiddigii ugu fiicnaa France 2019, iyadoo abaal-marintan si xoogan ay ugu tartameen magacyada xiddigo waaweyn.
Xiddiga kooxda Paris Saint-Germain ee Kylian Mbappé ayaa ku guuleystay abaal-marinta Laacibka ugu fiican France 2019, iyadoo ay abaal-marintan bixisay majalada caanka ah ee France Football.
20 jirkan ayaa ku garaacay abaal-marintan xiddiga kooxda Barcelona ee Antoine Griezmann, daafaca Real Madrid ee Raphaël Varane iyo sidoo kale khadka dhexe kooxda Chelsea ee N’Golo Kanté, kaasoo abaal-marintan ku guuleystay sanadkii hore.
Kylian Mbappé ayaa wuxuu door weyn ka ciyaaray in xulkiisa qaranka France uu ku guuleysto koobka adduunka 2018 ee lagu qabtay dalka Rusia, kaddib wuxuu xilli ciyaareed cajiib ah la qaatay kooxdiisa Paris Saint-Germain wuxuuna kula guuleystay horyaalka France Ligue 1.
Sidoo kale Mbappé ayaa wuxuu si xoogan kula tartamayay Lionel Messi abaal-marinta kabta dahabka ee gooldhaliyaha ugu sareeya Yurub, taasoo uu ugu dambeyntii ku guuleystay xiddiga reer Argantina iyo kooxda Barcelona kaddib markii uu dhaliyay 36 gool, halka Mbappé uu isna dhaliyay 33 gool.
Taas bedelkeeda, Griezmann kuma guuleysan wax koobab ah xilli ciyaareedkii la soo dhaafay isagoo joogay xilligaas kooxda Atletico Madrid, si la mid Raphaël Varane ayaa la qaatay Real Madrid xilli ciyaareed xun.
Waxaa xusid mudan in guuleystaha abaal-marintan lagu doorto codeyn gaar ah ay sameeyaan saxafiyiinta iyo ku guuleystayaashii hore ee abaal-marintan.
Gool FM.