(Manchester) 04 Jan 2020. Daafacii hore ee Man United Rio Ferdinand ayaa magacaabay saddex xiddig oo uu doonayo inay la soo saxiixato kooxdiisii hore ee Manchester United suuqa kala iibsiga bishan Janaayo.
Kooxda Man United ayaa guuldarro 2-0 ah kala kulantay Arsenal Arabcadii, waxaana ay niyad-jabkaas ku bilowdeen sanadkan 2020, iyadoo Red Devils ay shan dhibcood ka dambeyso booska kaalinta shanaad ee kala sarreynta horyaalka Premier League oo ay jirto Chelsea.
Weli waxa ay fursad u haysataa Man United inay ku dhammaysato afarta sare, waxaana ay sidoo kale ku sii jiraan saddex tartan oo kale.
Suuqa kala iibsiga xiddigaha ayaa furmay bishan Janaayo dhammaan kooxaha Premier League ayaana doonaya inay ganacsi ka sameeyaan, Man United ayaana xaqiiqdii noqon doonta mid ka mid ah kooxaha ugu firfircoon.
Waxa ay ku guuldarreysteen saxiixa Erling Haaland kaasoo ku biiray Borussia Dortmund kaddib markii uu ka soo tagay RB Salzburg, laakiin Rio Ferdinand ayaa soo tuuray saddex magac oo uu doonayo inuu ku arko oo ay la soo saxiixato kooxdiisii hore ee Red Devils.
Isagoo adeegsanaya bartiisa Twitter-ka ayuu Ferdinand magacaabay xiddigahaas, waxaana ay kala yihiin; labada ciyaaryahan ee ka wada tirsan kooxda Napoli ee Kalidou Koulibaly & Fabian Ruiz iyo sidoo kale Weeraryahanka Naadiga Paris Saint-Germain ee Edinson Cavani.
Gool FM.