(Liverpool) 25 Jan 2020. Xiddiga reer Brazil iyo kooxda Liverpool ee Fabinho ayaa ka hadlay wararka xanta ah ee sheegaya in saaxiibkiis hore naadiga Monaco haatana u ciyaara PSG ee Kylian Mbappé uu imaanayo garoonka Anfield.
Magaca Kylian Mbappé ayaa la la xiriiriyay in ka badan hal jeer inuu u dhaqaaqayo kooxda ka ciyaarta horyaalka Premier League ee Liverpool.
Haddaba Fabinho ayaa wuxuu aamminsan yahay sida ay u adag tahay in kooxda Liverpool ay la soo saxiixato Kylian Mbappé xilligan, sababo la xiriira magacyada ay ku haysato garoonka Anfield, gaar ahaan dhanka Weerarka hore oo ay wada joogaan xiddigaha Saalax, Mane iyo Firmino.
Fabinho ayaa wareysi uu ku bixiyay Wargeyska “Metro” ee dalka England wuxuu kaga hadlay wararka Kylian Mbappé la xiriirinaya kooxda Liverpool wuxuuna yiri:
“Xilligan la joogo way ku adkaan doontaa qof walba, sababtoo ah saddexda weerar ee aan hadda haysano waa kuwo aad u wanaagsan”.
Yeelkeede, xiddigaha Fabinho iyo Kylian Mbappé ayaa waxay si wadajir ah uga soo wada ciyaareen kooxda Monaco, ka hor inta aysan ku kala biirin kooxaha Liverpool iyo Paris Saint-Germain.
Gool FM.